BAGUIO CITY– Naituding a marugian ti pilot test ti Department of Education (DepEd)- Baguio kadagiti nagduduma a wagas ti distance learning iti uppat a pagadalan iti dua a barangay ditoy siudad sakbay ti pormal a panagrugi ti klase iti school year 2020-2021.
Sigun kenni DepEd-Baguio Assistant Schools Division Superintendent Soraya Faculo, makipaset iti nasao a pilot test ti nasurok 2,800 a learners manipud iti Guisad Valley National High School ken Bonifacio Elementary School sadiay Barangay Crescencia Village ken iti Happy Hallow National High ken Happy Hallow Elementary School sadiay Happy Hallow Barangay.
Dinakamatna a karaman metlaeng iti pilot test ti Alternative Learning System ti DepEd.
Inlawlawagna a napili dagiti nasao a pagadalan kas maibasar iti lokasyon dagitoy tapnu makita dagiti karit a mabalin a sangwen dagiti estudyante iti nagduduma a disso iti siudad.
Innayonna a maipadas kadagiti nasao a pagadalan ti Modular Distance Learning, Online Distance Learning ken ti blended learning.
