Dumanonen iti innem nga indibidual ti pimmusay, gapu paylaeng iti epekto ti bagyong Aghon, sigun kenni Office of Civil Defense (OCD) spokesperson Edgar Posadas.
Sigun iti Office of Civil Defense (OCD), nakumpirmaren ti maysa nga indibidual a pimmusay, bayat a dagiti lima ket manarimaan paylaeng ti pannakakumpirmar dagitoy.
Kinuna ni Posadas a nakumpirmar a pimmusay ti maysa nga agtawen iti sangapulo ket uppat manipud Region 10 gapu iti nasagrap daytoy a nakaro a physical injury kalpasan a natupakan daytoy iti natumba a kayo.
Malaksid iti dayta, nadangran met dagiti walo nga indibidual manipud Bicol ken Norther Mindanao kas maibasar iti datos manipud iti National Risk Reduction and Management Council (NDRRMC).
Kabayatanna, dumanonen iti 36,143 nga indibidual ti naapektaran gapu iti bagyo kaaduan kadagitoy ket manipud Calabarzon no sadino dumanon daytoy iti agarup 19, 180 nga indibidual, bayat nga idiay Bicol ket dumanon iti 10,349.
Nagbakwit met kadagiti evacuation centers dagiti 16,426 nga indibidual, kaaduan kadagitoy ket manipud paylaeng iti Calabarzon.
