Nangilukat ti temporario a “morgue” dagiti Spanish rescuers iti convention center idiay pagilian nga Spain gaputa ngimmato ti bilang dagiti pimmusay a tattao gapu iti panaglayos.
Maibasar iti listaan dagiti otoridad, dumanon iti dua gasut ken lima a tattao ti pimmusay gapu iti saan a nasayaat a paniempo, a napasamak kalpasan ti lima a dekada.
Idiay Valencia, Spain, dumanon met iti dua gasut ken dua ti pimmusay, sigun kadagiti otoridad.
Dandani agpada ti bilang ti pimmusay idi tawen 1970 nu sadinno, dua gasut ken siam ti pimmusay gapu paylaeng ti panaglayos.
Kabayatanna, dumanon iti lima gasut a suldado ti naideploy tapno mangbiruk kadagiti tattao a mapukpukaw ken tulungan dagiti nakalasat iti nasao a bagyo.
Bayat ti press conference dagiti otoridad sadiay Spain idi laeng kalman, impakaamoda a mabalin a ngumato pay ti nasao a bilang gaputa agtaltalinaed nga adda pay dagiti saan a nairekord a pimmusay manipod iti dadduma a lugar.
Maipalagip a napigsa ti panagtudtuduna idiay Spain idi rabii ti Martes a rason ti pannakadadael dagiti kalsada, “railtracks,” ken rangtay.
