BAGUIO CITY – Maangay ita a bulan ti Pebrero ti pinal nga imbestigasyon ti Kamara seknan iti ‘disparity’ ken ‘overpricing’ dagiti produkto a petrolyo iti siudad ti Baguio ken probinsia ti Benguet.
Iti panakiyuman ti Bombo Radyo kenni Baguio City Representative Mark Go, kinunana a tallon a sesyon iti Kamara ti naangay idi napalabas a tawen a nangimbestigaranda iti nasao a pakaseknan nga awan pay ti resulta dagitoy.
Sigun kenkuana, nanginngina iti P4-P5 ti gasolina bayat nanginngina iti P10-P14 ti krudo iti Baguio ken Benguet no idilig sadiay Rosario, La Union idinto ta agarup agpada ti kaadayo dagitoy iti Puro Point a pagtataudan dagiti produkto a petrolyo.
Impettengna a saan a balido ti rason dagiti kompanya iti panangipangato dagitoy iti presyo dagiti produkto a petrolyo ditoy lokalidad a kas iti cost of transportation ken ti kompetisyon.
Innayonna a babaen iti panagimbestigarda ket mabukel ti linteg a mang-amyendar iti agdama nga Oil Deregulation Law tapnu maipaayan ti Department of Energy iti bileg a mangkontrol iti panakaipangina dagiti produkto a petrolyo.
Dinakamatna nga iti agdama nga Oil Deregulation Law ket dagiti laeng kompanya ti lana ti mangkonkontrol iti presyo dagiti produkto a petrolyo.
Agtalek pay ni Go nga iti sumaruno a panagdengngeg iti Kamara ket addan ti resulta tapnu marisut ti pakaseknan dagiti motorista iti lokalidad ken iti dadduma a paset ti pagilian a makapaspasar iti kapada a pakaseknan.
