BAGUIO CITY- Naituding nga irepresentar ti Cordilleran Elite Ultramarathoner a ni Sandi Mechi Abahan ti pagilyan a Pilipinas iti dua nga Obstacle Course Race (OCR) a maipatungpal iti pagilyan a Vietnam ken Nepal ita a tawen.
Sigun iti multi titled runner, agturong daytoy iti Ho Chi Minh City iti pagilyan a Vietnam intun Biarnes tapno makisalip iti 4th leg ti Spartan Trail World Championship (STWC), ti kadakkelan nga Obstacle Course race iti sangalubungan a maisayangkat intun Oktubre 23, 2022.
Masubok ti kabaelan ni Abahan iti nasao a torneo gapu iti naisagana a 20 classic obstacle courses pakairaman ti off road terrain iti pitak ken danum a tarayen dagiti athleta, panagkalay-at kadagiti pader, panagkarayam kadagiti sirok ti barot, panagbitin iti monkey bars ken dadduma pay.
Idi laeng napalabas nga Oktobre 15-16 ket nagkampeon ti atleta manipud Baguio City 3rd leg ti STWC series iti 50k Borneo Trail Classic 2022 idiay Kuching Sarawak, Malaysia ken napangabakan na met laeng ti 2nd leg idi Agosto sadiay Thailand.
Kabayatan na, pagsagsaganaan pay ti Igorota trail runner ti prestihyoso a World’s Highest OCR a maisayangkat sadiay Kathmandu, Nepal intun Nobiembre 8 iti agdama a tawen.
Agbalin a rota dagiti atleta ti trail wenno dalan paturong iti base camp ti Mount Everest nga addaan iti kangato a nasurok iti 5,300 meters wenno 17, 598 feet above sea level.
Magudwa iti tallo a phase ti nasao a pasalip, ti umuna a phase ket ti ascent wenno panagsang-at ti team Pilipinas agingga iti base camp ti Mount Everest, maikadwa ket ti World Record Breaking Obstacle course nu sadino maipasidong iti nagduduma a pasalip dagiti atleta kas iti Cargo net crawl, Balance beam, Low wall, Sand bag carry, Cargo net climb, High wall, Monkey bars, Hanging traverse, Mountain swing ken The Wall ken ti maudi a phase ket ti indibidual races agpababa mangrugi iti base camp agingga a madanon da ti Pheriche camp nga addaan iti 4,300 meters above sea level.
Ti highest ocr ket maipatungpal iti uneg ti sangapulo ket uppat nga aldaw iti kabanbantayan ti kangatuan a bantay iti entero a lubong.
Impatalged ni Abahan a nakasagana daytoyen iti nakaro a kinalam-ek a klima iti Mt. Everest gapu ta immuna metten a nakapadas iti high altitude racing iti panagkampeon na iti 1st World’s Highest OCR ken World Record Breaking Challenge idiay Mount Kilimanjaro, Tanzania nga addan iti 5,755 meters elevetion level.
Pinagyaman pay ti 2019 SEA Games gold medalist ti Philippine Sports Commission ken dagiti sponsors na iti agtultuloy a suporta nga ipapaay dagitoy iti training.//JT
