Manamnama nga agtultuloyen ti panakailukat ti Pines Park Bridge sadiay Balili, La Trinidad, Benguet kalpasan a nailukat daytoy kadagiti motorista idi Abril a kinse ti agdama a tawen.
Iti panakiuman ti Bombo Radyo kenni Billy Bilango, kapitan ti barangay Balili, La Trinidad, kinunana nga agarup maysa a tawen met nga inur-urayda ti panakaileppas ti Pines Park Bridge ken iti panaglukat daytoy ket one way traffic laeng ti mabalin, ti paserrek iti nasao a rangtay manipud iti national highway.
Sigun kenni Bilango, addan dagiti street lights a naipasdek iti nasao a rangtay a dumanon iti agarup baente bayat a nadalusanen ti rangtay a pagnaan dagiti tattao ken naikkaten dagiti steel bars.
Innayon ti nasao a kapitan a naikkatten met dagiti daduma a machines a nausar para iti rangtay bayat a dagiti daduma ket sitatalinaed para iti panakausar dagitoy iti panakadalos ti sirok ti Pines Park Bridge ken ti panakatarimaan pay daytoy.
Kabayatanna, awan pay ti update maipapan iti expropriation proceedings dagiti lote dagiti pribado nga indibidual a manamnama a gatangen ti gobyerno para iti panakailaylayon a panakaaramid ti rangtay.//Bombo Mera Pacpacan
