Kidkiddawen dagiti jeepney drivers ken operators ita nga aldaw iti Korte Suprema nga agtignay iti petisionda para iti Temporary Restraining Order kontra iti Public Utility Vehicle Modernization Program (PUVMP).
Namnaen paylaeng ni Pagkakaisa ng mga Samahan ng Tsuper at Opereytor Nationwide (PISTON) Deputy Secretary Ruben “Bong” Baylon nga agipaulog ti nangato a korte ti Temporary Restraining Order.
Sigun kenni Baylon, patienna a nalalaing dagiti nagtakem iti posision iti nasao a nangato a korte isut gapuna a namnamaenda a maipulog ti petision a kiddawda.
Idi Disiembre iti napalabas a tawen, kiniddaw ti PISTON ken sumagmamano a transport group iti Korte Suprema nga ideklarada a “null and void” ti sumagmamano a naipaulog a government transportation agencies ken nangipaay ti TRO tapno malapdan ti panangipatungpal dagiti respondents iti nadakamat a pannakaipaulog.
Idi napalabas a lawas, kinuna ti Korte Suprema a ti petision ti PISTON ket manarimaan a mapagtaltalantanan.
Kiniddaw ti nasao a korte nga agkomento ti Department of Transportation (DOTr) ken Land Transportation Franchising and Regulatory Board (LTFRB) iti nasao a petision ngem awan paylaeng ti komento dagitoy.
Impaganetget ni Baylon a nu saan a mapatgan ti kiddawda a TRO, agtuloy latta ti operasion dagitoy.
“Kahit dumating po ang April 30, bya-byahe pa rin po yung mga operator na naninindigan para sa kanilang karapatan,” kinuna
Iti sidong ti nasao a programa, kasapulan nga amin a jeepney drivers ken operators ket makipaset wenno mangbukel ti bukodda a kooperatiba, ken mabalin dagitoy nga agaplikar ti baro a prangkisa kas paset ti transport cooperatives.
Maipalagip nga impablaak ni President Ferdinand Marcos Jr a saan a mailaylayon ti deadline ti consolidation a naituding inton Abril 30.
