BAGUIO CITY – Nairaman ti uppat a barangay ti Baguio City ken tallo pay a barangay iti probinsia ti Benguet kadagiti lugar a pinili ti Vaccine Expert Panel a pakaisayangkatan ti Solidarity Trial para iti COVID-19 vaccines inton sumaruno a bulan ti Enero.
Maibasar iti listaan, dagitoy ket dagiti barangay ti Legarda Burnham, Aurora Hill, Santa Escolastica ken City Camp Proper iti Baguio City ken dagiti barangay ti Virac ken Poblacion Central iti Itogon ken Barangay Camp 3 iti Tuba iti probinsia ti Benguet.
Sigun kenni Department of Science and Technology-Vaccine Expert Panel chief Dr. Nina Gloriani, napili dagiti nasao a lugar gapu iti nailista dagitoy a 1% attack rate ken karaman kadagiti addaan ti nangato a kaso ti COVID-19.
Linawlawaganna met a mabalin nga agballiw wennu masukatan dagiti nasao a barangay kas maibasar iti agbalin a sitwasyon wennu kaso nga mailista dagitoy ita a bulan.
Innayonna a napili metlaeng ti Baguio General Hospital and Medical Center kas maysa kadagiti para-publiko a pagagasan a pakaisayangkatan ti nasao a clinical trial.
