BAGUIO CITY–Nanayonan ti bilang dagiti pimmusay ken nadangran gapu iti epekto ti habagat iti Cordillera Region.
Maibasar kadagiti impormasion a nakalap ti Bombo Radyo-Baguio, dumanonen iti pito dagiti pimmusay iti rehion gapu iti habagat.
Iti kaudian a report ket karaman kadagiti pimmusay ti maysa a baro a ni Christian Asiong Babsa-ay, agtawen iti duapulo ket innem, kalpasan a nagaburan iti nargaay a daga Km. 73, Amgaleyguey Buguias Benguet idi Sabado.
Pimmusay met laeng ti agasawa a da Florentino Ligaten, 50-anyos ken Christina Ligaten, 45-anyos bayat a nadangran ti anakda a ni Clifford Ligaten, 14-anyos kalpasan a nagaburan iti nargaay a daga ti pagtaenganda sadiay Tagpaya, Madaymen, Kibungan, Benguet.
Sigun ken ni PSI Marcial Valdez, hepe ti Kibungan Municipal Station, nagresponde a dagus dagiti kaaruba ti pamilia ngem naideklara a dead on the spot ti ag-asawa bayat a naitaray ti pagagasan ti anak dagitoy.
Maipalagip a pimmusay met laeng gapu iti habagat ni Mencio Amitem nga agtawen iti 57 kalpasan a naiyanod iti Badiwan Creek sadiay Tuba, Benguet.
Narekober met idi Agosto 14 ti bangkay ti balasang a ni Krystel Marlin nga agtawen iti 19 kalpasan a naiyanod iti kanal sadiay met laeng Tuba, Benguet.
Immunan a naipadamag a pimmusay ti maysa a lakay nga agtawen iti 81 a nabigbig a ni Rufino Catalino kalpasan a natnag daytoy iti rangkis sadiay Gayaman, Luba, Abra kabayatan ti habagat.
Maipalagip a pimmusay met laeng ni truck helper a ni Rodrigo Navalta Maon kalpasan a natnag iti rangkis sadiay Atok, Benguet ti nagluganan daytoy a trak.
Malaksid kadakuada ket pimmusay met laeng ti dua a minero gapu iti gas poisoning sadiay Itogon, Benguet idi Agosto 14.
