Ambaguio, Nueva Vizcaya- Pimmusay ti pito nga indibidual idiay Barangay Labang, Ambaguio, Nueva Vizcaya kalpasan ti panagdalapos ti bagyo a Pepito, sigun kadagiti otoridad.
Sigun iti Provincial Disaster Risk Reduction Management Council (PDRRMC) ti nasao a probinsia, nagaburan ti balay dagiti agkakabagian nga adda iti igid ti bantay ti balayda, ken nakilinong ti dadduma idi nagdalapos ti bagyo.
Nabigbig dagiti pimmusay a biktima a da Angel Calanhi, 18; Maxcel Calanhi, 13; Balagan Calanhi, 16; Niko Tindaan, 14; Oscar Tindaan, 30; Jaymar Liwan, 12, ken Janna Faith, Calanhi, 8-anyos.
Dagiti biktima ket matmaturog iti pagtaengan ni Brgy. Kagawad Selo Calanhi idi naggurruod iti napigsa ket kalpasan daytoy ket nagabburan ti nasao a pagtaengan iti panagregaay ti daga.
Ni Selo ket nabalkut ti napuskol a pitak ken nagsagaba iti sugat kasta met da Thelma ken Mawi Shane Calanhi iti uneg ti nadakamat a pagtaengan ngem nagasat ta nakalasat dagitoy iti insidente.
Naammuan a tultulongan ni Selo dagiti kalugaranna iti preemptive evacuation ti maysa a pagadalan ken day care center idi napasamak ti panagreggaay ti daga iti lugarda.
Dumanon iti uppat a ribo dua gasut ken siam a pulo ket pito nga indibidual wenno sangaribo sangagasut siam a pulo ket walo a pamilia ti nagbakwit idi nagdalapos ti bagyo a Pepito, a dumanon iti kinapigsa ti super typhoon idi dimteng daytoy iti Pilipinas.
Sigun kenni Nueva Vizcaya Governor Jose Gambito, aldaw ti Biyernes paylaeng idi nagballaag dagitoy para iti panagbakwit ngem naklaat ti amin gaputa uray kadagiti saan a nalayus a lugar ket ngimmato ti lebel ti danum.
Sumagmamano met a dike ti nadadael, natnag dagiti poste, natay dagiti taraken ken saan a mabilang a babbalay ti nadadael ken naitayab.
Iti agdama, “total blackout” ti kuryente sadiay sigun iti Nueva Vizcaya Electric Cooperative.
Numan pay nakalukat ti dalan paturong iti dadduma a probinsia ken siudad, adu a kayo ti natumba ken adu a sanga ti kayo ti nakalaylay kadagiti linya ti koriente.
