Sumangsango itan dagiti pito nga indibidual iti kaso gapu iti panaglabsingda iti Republic Act 9165 wenno ti Comprehensive Dangerous Drugs Act of 2002.
Daytoy ket kalpasan ti insayangkat dagiti otoridad a buy-bust operation kalpasan a nag-epektibo ti pain nga inaramid dagitoy idiay Ongasan Loakan Proper, Baguio City idi laeng kanikadua.
Sigun kadagiti otoridad, naisayangkat ti nasao nga operasyon iti uneg ti maysa nga apartment a pagnanaedan dagiti suspek no sadino nadanunanda dagitoy nga agpopot session bayat a dagiti dadduma ket agi-inumda.
Bayat ti panagserrekda iti nasao nga apartment, naimatangan dagitoy dagiti agkaiwara nga iligal a droga, no sadino naduktalan metlaeng a naglaon dagiti pakete ti sigarilyo iti shabu ken dried marijuana leaves.
Nabigbig met dagiti suspek a tauhan ti maysa a sub-kontraktor iti maysa a semiconductor company iti siudad ti Baguio no sadino night duty amin dagitoy.
Malaksid iti dayta, naamuan metlaeng a dagiti uppat kadagitoy a suspek ket siguden nga addaan iti kaso.
Dagiti suspek ket pakairamanan da Laren Lipata, manipud Olongapo City ti agab-abang iti nasao nga apartment ken maintainer ti Drug Den, Rolando Natividad, Kevin Rancis, Romer Tulipa agpada a taga Cavite, Ronie Celestino ken Lucio Cabaros agpada metlaeng a taga Las Pinas kenni Richard Vibar manipud Quezon City.
Nagresulta met ti nasao nga operasyon iti pannakaarestar dagitoy ken ti pannakakumpiskar dagiti innem a pulo ket innem a pakete ti maatap a shabu nga agdagsen iti 10 grams ken ti 100 grams a marijuana nga aggatad iti P12,000.
Iti agdama, addan dagiti suspek iti kustodiya dagiti otoridad para iti kanayunan a dokumentasyon bayat a maisagsagan dagiti maipila a kaso kadakuada.