Pimmusay ti pito pulo nga indibidual kalpasan ti airstrike a nangpuntiria iti maudi nga ospital iti North Darfur idiay Sudan.
Dagiti kangrunaan a biktima ket dagiti babbai ken ubbing.
Sigun kenni World Health Organization director-general Tedros Adhanom Ghebreyesus, iti tiempo ti panagatake, ti ospital ket napunno ti pasiente nga agpatpataming.
Ti panangraut iti Saudi Teaching Maternal Hospital idiay El Fasher ket mangmarka iti kaudian a kinaranggas iti duapulo a bulan a civil war iti nagbaetan ti paramilitary a Rapid Support Forces (RSF) ken ti Sudanese Armed Forces (SAF) a nangtignay iti maysa kadagiti “worst humanitarian crises” ken nakatayan ti nasurok a 20,000 a tattao ken nang-displace iti nasurok a 11 milion a dadduma pay a tattao, sigun iti United Nations.
Ti naipatungpal nga airstrike ket maysa kadagiti panagatake a nagresulta iti ipupusay dagiti sibilian.
Idi napalabas a bulan, nasurok sangagasut a tattao ti napapatay kalpasan a nagdisso ti bomba iti kaaduan a tattao idiay Kabkabiya, maysa nga ili iti North Darfur.
Saan a dinakamat ni Ghebreyesus ti responsable iti panagatake.
Masansan nga agpipinnabasol ti Rapid Support Forces (RSF) ken ti Sudanese Armed Forces (SAF), agpada nga idadauloan ti dua kadagiti kabibilgan a heneral ti Sudan, da Abdel Fattah al-Burhan ken Mohamed Hamdan Dagalo – a pagaammo met kas Hemedti – a mangisayangkat iti drone attacks kadagiti sibilian a lugar.
Pinabasol ni Darfur Gobernador Mini Minnawi ti Rapid Support Forces (RSF) gapu iti panagatakeda iti ospital, ken kinunana a pinapatayda dagiti amin a pasiente iti uneg ti ospital.
Inakusaran metlaeng ti Sudan foreign ministry ti Rapid Support Forces (RSF), ken inladawanda ti panagatake kas “massacre.”
Saan metten a nagkomento ti Rapid Support Forces (RSF) seknan iti nasao a banag.
