Inlawlawag ni Baguio City Vice Mayor Atty. Faustino Olowan a ti plano a pannakadevelop ti Baguio City Public Market ket karaman iti Annual Investment Plan.
Ti Annual Investment Plan ket ditoy a nakarekord dagiti assumption projects para iti siudad. Nupay kasta, adda dagiti unfunded project nga isu ti dumalan iti contract process, national government funding ken public-private partnership process (PPP).
Iti kaso ti re-development ti Baguio City Public Market, dumalan daytoy iti Public-Private Partnership Process nu sadino ti SM ti project proponent.
Sigun kenni Olowan, adda ti maipatungpal nga executive session nu sadino posible a paayabanda ti project proponent kadagiti sumarsaruno nga aldaw tapno talantalenda dagiti kanayunan a kondisyon seknan iti implementasyon ti nasao a proyekto.
Inlawlawag pay ti nasao nga opisyal a dumalan pay ti Baguio City Public Market re-development project iti city council no sadino ditoy a madesisyonan nu maituloy ti implementasyon daytoy.
Sakbay a mapasamak ti executive session, adda pay dagiti maangay a public consultation a dar-ayan dagiti umili ti siudad nga isu met ti maysa kadagiti pagbasaran ti lokal a konseho nu agdesisyondanto.
Malaksid iti daytoy, kinuna pay ni Olowan a ti maipatpatungpal ita a panagpetisyon wenno signing campaign dagiti sumagmamano nga umili ket makaapekto iti diskusyon ti nasao a proyekto.
Impettengna a karbengan dagiti umili ti petition signing gapu ta maysa daytoy a good practice of democracy ngem kasapulan a dumalan met laeng iti umno a proseso.
Impanamnama met ni Vice Mayor Olowan a nakasaganada a mangdengngeg iti kapanunutan ti publiko sakbayda nga agdesisyon. | Bombo Karen Sapirao
