BAGUIO CITY – Nainget a tinubngar dagiti clan leaders ken dagiti maseknan a punong barangay sadiay Loakan ti panggep nga eksplorasion ti Golden Era Mining Corporation kadagiti masakupan dagitoy a barangay.
Impetteng dagiti kapitan ti barangay Lucnab, Kias, Loakan-Apugan, Atok Trail ken Happy Hallow a saanda a pabor iti nasao a panggep iti panagparangda iti sesyon ti lokal a konseho ti siudad ti Baguio idi kalman.
Inlawlawagda a saan a naipakpakaammo kadakuada ti panggep nga eksplorasion gaputa awan ti naipatungpal nga information dissemination kadagiti masakupanda a babbarangay.
Dinakamat met ti bise-presidente ti Happy Hallow Indigenous People’s Organization a nainget met laeng a tubtubngaren dagiti nainsigudan nga umili ti a panggep ti nasao a kompania nangruna ta tarigagayda a masalwadan ken maprotektaran ti aglawlaw.
Maipalagip nga idi March 30, 2016, impaay ti Mines and Geosciences Bureau ti exploration permit iti nasao a kompanya ti minas para iti eksplorasyonda iti 448 hectares a mangsaksakop kadagiti barangay ti Kias, Happy Hallow, Loakan Apugan ken Atok Trail iti siyudad ti Baguio ken iti sumagmamano a paset ti Itogon, Benguet.
