BAGUIO CITY – Impasigurado ni Baguio City Mayor Benajamin Magalong ti panagbalin nga eco-park ti Irisan Dumpsite.
Sigun kenkuana, addan ti nakasagana a plano ken disenyo para iti nasao nga eco park ken nakitaripnongen daytoy kadagiti maseknan nga ahensia.
Dinakamatna nga addan ti nakasagana nga P18-M para iti plano a panagbalin ti Irisan Dumpsite kas culturally-inspired eco-park.
Naamuan a panggep ti mayor a matungpal ti plano inton 2020.
Sigun met kenni City Administrator Boni Dela Pena, ti plano ket insumitir ti City Engineering Office.
Kinunana nga apaman a maadalda ti plano ket itedda ti feedback iti daytoy.
Innayonna a tarigagayda nga agbalin ti Irisan Dumpsite kas maysa a parke para iti amin.
Dinakamatna a karaman iti plano ti panakaipasdek ti “dap-ay” para kadagiti aniaman a panagu-urnong, children’s park, panganan, nursery dagiti herbs, ornamental plants, dagiti landscape ken view deck.
Immunan nga impaayan ti Department of Environment and Natural Resources – Cordillera iti ultimatum ti lokal a gobyerno ti Baguio para iti panakaisimpa ti Irisan Dumpsite a pakaipoproseso-an dagiti marunrunot a basura ti siudad.
Imbilin pay ti ahensia ti panagbalin ti dumpsite kas environment friendly eco-park iti kabiitan a panawen. (with Bombo Brigitte Marcasi)