BAGUIO CITY – Imparang ti City Engineering Office ti binukelda a plano para iti panakaimuntar ti bike lane kadagiti sumagmamano a kalsada ditoy Baguio City.
Sigun kenni City Engineer Edgar Victorio Olpindo, dumanon iti P50-M ti pondo a maaramat para iti konstruksyon ti 14-kilometer bike lane.
Kinunana nga adda ti siyam a ruta a binigbigda a buklen ti City Hall-Legarda Road-Marcos Highway, City Hall-Harrison Road-Kalaw-Baguio Convention Center, Harrison Road-Bonifacio-Manuel Roxas, Loakan-Apugan-Panagbenga Park-North Drive, Panagbenga Park-BGH Rotunda ken Governor Pack Road-BGH Rotunda nga agserbi kas primary bika lane.
Nabigbig met ti Ambiong, La Trinidad, Marcos Highway, Loakan, Itogon, Sablan, Tuba ken Tublay kas secondary bike lanes.
Malaksid iti dayta, imbinglay ni Olpindo a tuttutukanda metlaeng ti panakaimuntar dagiti karatula, panakapintura ken panakatarimaan dagiti kalsada tapno mailisi iti aksidente dagiti agbisbisikleta.
Impettengna nga inyumanda iti DPWH ti planoda isut gapuna a manarimaan ti inspeksion kadagiti kalkalsada a maimuntaran dagiti bike lanes.
Immunan nga inlawlawag ni Olpindo a maitunos ti proyekto iti panggep ti lokal a gobierno a maital-o ti single transportation ditoy Baguio City.
