BAGUIO CITY – Isagsagana ita ti lokal a gobyerno ti Baguio City ti plano para iti panakapapintas ken panakatarimaan ti Baguio City Public Market.
Sigun kenni Councilor Maria Mylen Victoria Yaranon, dadaulo ti Committee on Public Works iti City Council, addan ti koordinasyonda kadagiti dadduma pay a maseknan a komite iti konseho ken ahensia ti gobyerno para iti nasao nga addang.
Kinunana nga ad-adalen ita dagiti legal officers ti lokal a gobyerno dagiti legal issues iti public market ken maal-ala metten ti pakabuklan a bilang ken listaan dagiti vendors sadiay.
Pinunas met ni Councilor Yaranon ti pagam-amkan dagiti vendors iti merkado publiko a posible nga adda dagiti maikkatan iti pwesto.
Kinunana a maiyakar laeng dagitoy babaen iti re-zoning wenno panakaisimpa dagiti pwesto tapnu agbalin nga organisado dagiti produkto a lako dagitoy.
Dinakamat pay ti konsehal a paset ti bukbuklenda a plano ti panangtutok iti environmental issues tapnu maipasigurado iti kinadalus ti merkado ken agbalin a komportable dagiti agturturong sadiay a makitienda. (-with Bombo Brigette Marcasi)
