BAGUIO CITY – Simmuko iti pulisya ti maysa a platoon leader dagiti rebelde a New People’s Army (NPA) nga addaan operasyon sadiay probinsia ti Kalinga.
Nabigbig daytoy a ni ‘Ka Diwa’, platoon leader ti Lejo Cawilan Command ti Komiteng Larangan Gerilya Baggas ti NPA.
Simmuko ni Ka Diwa kadagiti pulis sadiay Camp Duyan, Tabuk City ken insukona metlaeng ti maysa a machine gun, dua a 60-mm mortars nga addaan tallo a mortar ammunition ken maysa a homemade shotgun a naglaon ti tallo a bala.
Sigun kenni PMaj. Carol Lacuata, information officer ti Cordillera Police, addaan ni Ka Diwa iti warrants of arrest gapu iti sangsangwen daytoy a lima a bilang ti kaso nga attempted murder nga addaan pakabuklan a piyansa ti P680,000.
Kinunana a mas pinili ni Ka Diwa ti mangsango kadagiti kaso daytoy no ti agbiag nga aglemlemmeng iti bantay nangruna ta masaksaksian pay daytoy ti panakatay dagiti agtutubo gapu iti awan kaes-eskan a pananglabanda iti gobyerno.
Dinakamatna a saan a naibturan ni Ka Diwa dagiti dakes nga aramid ti CPP-NPA, pakairamanan ti kaawan disiplina dagiti opisyal dagiti rebelde ken ti agtultuloy a panangallilaw, panangaramat ken panag-recruit-da kadagiti agtutubo.
Naamuan nga adda iti kustodiya ti Kalinga Police Provincial Office ni Ka Diwa bayat a maur-uray ti panakapiyansana manipud kadagiti sangsangwenna a kaso ken iti panakaiproseso dagiti maikalkalikagum para iti panagnumarna iti Enhanced Comprehensive Local Integration Program ti gobyerno para kadagiti rebel surrenderee.
Makikokoordinar metten dagiti pulis ti Kalinga iti lokal a gobyerno ti Balbalan para iti panakaur-or ti maaramat a piyansa.
