BAGUIO CITY – Agtalinaed a nakarikep manipud iti general public ti Philippine Military Academy (PMA) kasaruno ti panagkaro ti 2019 novel coronavirus (2019-nCoV).
Iti interview ti Bombo Radyo kenni Capt. Cheryl Tindog, PMA Public Information Officer, kinunana nga impaulog ti akademya ti pammilin para iti lockdown ti PMA kadagiti turista ken sangaili kasaruno ti panangitantan ni Mayor Benjamin Magalong iti dadakkkel nga aktibidad ti Panagbenga 2020.
Inlawlawagna a ti aksiyon ti liderato ti PMA ket pas paset ti proactive measure tapnu masalwadan dagiti kadete manipud iti risgo ti nCoV.
Kinunana a saan metten a maipalubos ti iruruar dagiti kadete manipud iti PMA ken sinuspindirda pay amin nga aktibidad dagiti kadete iti ruar ti akademya.
Nupay kasta, linawlawagan ni Capt. Tindog a mabalin latta a makastrek iti PMA dagiti agsarungkar a kabagian dagiti kadete ngem kasapulan a dumalan dagitoy iti kaskenan a proseso iti PMA Station Hospital.
Innayonna a maipalubos laeng ti panagsarungkar dagiti turista iti PMA no adda ti balakad dagiti health authorities nga awanen ti pangta ti nCoV.
