BAGUIO CITY – Naibiahen paawid iti pagtaenganda sadiay Alcala, Cagayan ti bangkay ti kadete iti Philippine Military Academy (PMA) a pimmusay iti pagagasan gapu iti sakit daytoy.
Binigbig ni PMA information officer Lt/Col. Rey Balido ti pimmusay a ni Cadet Fourth Class Erwin Christian Vergara nga agtawen iti sangapulo ket siyam.
Kinunana a manipud iti PMA ket naitaray ti biktima iti Baguio General Hospital and Medical Center idi April 25 ken sadiay a na-admit agingga idi May 1 agingga a pimmusay idi kalman.
Dinakamatna a ti rason iti ipupusay ti nasao a kadete ket ti hypovolemic shock wenno nakaro a blood loss gapu iti nakaro a panagdara ti tiyan daytoy gapu iti peptic ulcer.
Impasigurado pay ni Balido a maawat daydi Cadet Vergara dagiti benipisyo dagitoy manipud iti akademya kas iti special financial assistance.
Innayonna met a maladladingitan ita ti PMA iti panakapukaw ti maysa a kadete daytoy kagiddan ti panangipadanunda iti panakipagriknada iti pamilya ti nasao a kadete.
Naamuan a ni Cadet Fourth Class Vergara ket maysa kadagiti kadete a mangbukel to iti PMA Class of 2021 nga inawat ti akademya idi April 1 babaen iti traditional reception ceremonies.
Iti agdama ket maipaspasidong dagitoy iti dua a bulan a summer training wenno Beast Barracks sakbay ti Incorporation Ceremony a pakabigbigan dagitoy kas regular members ti Cadet Corps [KOR] of the Armed Forces of the Philippines.-
