BAGUIO CITY – Nagkedked nga agkomento ti Philippine Military Academy (PMA) seknan iti viral a ladawan ti maysa a kadete ken ni Miss Universe-Australia Caris Tiivel.
Maipalagip a mapagsarsaritaan ita iti social media ti ladawan ni Tiivel ken ti PMA cadet a nagserbi nga escort daytoy iti panagsarungkarda ditoy siudad ti Baguio idi Miyerkules.
Naala iti camera ti napnuan iti kaypapanan a panangmatmat ti nasao a PMA cadet iti beauty queen.
Makilkilig ti adu a netizens gaputa arigna napnoan iti panagayat ti wagas ti panangkita ti kadete iti nasao a kandidata.
Kabayatanna, nakaawat met iti nagduduma a reaksyon manipud kadagiti netizens ti video manipud iti facebook page ti Bombo Radyo Baguio, a ti kadete ti nakakibin kenni Miss Universe-US Virgin Island Carolyn Carter.
Impadas ti Bombo Radyo News Team nga alaan iti komento dagiti nasao a kadete ngem nagkedked ti akademya a mangipaay iti mensahe.
