BAGUIO CITY – Linawlawagan ti Philippine Military Academy nga awan ti impapaulog dagitoy nga official statement mainaig pay laeng iti mensahe nga agwarwaras iti social media a mangipakpakaammo iti kaada ti Abu Sayyaf ken NPA ditoy lokalidad.
Segun kenni PMA information officer Lt. Col. Reynaldo Balido Jr., awan ti impapaulog ti akademya a waragawag ken saan a nagtaud kadakuada ti agwarwaras ita iti social media.
Inlawlawagna pay a kasaruno ti panakaisanod ti ceasefire ken panakaideklara ti all our war kontra iti komunista a rebelde ket naipasidong iti red alert ti Armed Forces of the Philippines agramanen ti PMA.
Impettengna a ti panakauram ti dua a truck ti kompanya ti pagminasan sadiay Itogon, Benguet ket nairana laeng bayat a naka-red alert dagitoy.
Innayunna pay a tunggal naka-red alert ti akademya ket maibilbilang nga standard operating procedure wenno SOP ti panakaipawil ti panagserrek dagiti turista sadiay.
Maipalagip a karaman kadagiti pagsagsaganaan ti akademya ket ti umadanin a PMA Alumni Homecoming dagitoy inton sumaruno a lawas.
