BAGUIO CITY – Temporaryo a mairikep kadagiti turista ti Philippine Military Academy wenno PMA a masarakan ditoy siudad ti Baguio kasaruno ti panangideklara ti Northern Luzon Command iti blue alert.
Iti panakiuman ti Bombo Radyo kenni Lt. Col. Reynaldo Balido Jr., panakangiwat ti PMA, kinunana a mairikep ti akademya manipud kadagiti turista iti las-ud ti pito nga aldaw, ken daytoy ket mangrugin inton bigat.
Inlawlawagna nga ‘standard operating procedure’ ti PMA nga irikep ti akademya kadagiti turista nu nakadeklara ti blue alert.
Kinunana a daytoy ket gapu pay laeng iti mapaspasamak a riribok sadiay Mindanao a naipasidong iti linteg-militar ken saanda nga ik-ikkaten ti posibilidad nga adda ti mapasamak a terrorist activities iti dadduma pay a paset ti pagilian.
