BAGUIO CITY – Temporaryo a mairikep manipud kadagiti turista ti Philippine Military Academy (PMA) para paylaeng iti maangay nga Alumni Homecoming inton Pebrero 18.
Sigun kenni PMA Information Officer Lt. Col. Rey Balido Jr., mapawilan dagiti turista manipud iti iseserrek dagitoy iti akademya mangrugi ita nga aldaw para iti maisayangkat a panagsaganada agingga iti mismo nga aldaw ti homecoming inton Sabado.
Immunan a kinumpirmar ti PMA a ni Presidente Rodrido Duterte ti agserbi a guest of honor iti alumni homecoming ti akademya.
Kinuna pay ni Balido a ti Presidential Security Group ti mangimaton iti seguridad ti aktibidad inton Sabado.
Mangrugi metten ti preliminary activities ti homecoming inton bigat ken agleppas inton Dominggo a paka-angayan ti silent drill dagiti kadete.
Iti kanito a dumar-ay ni Pres. Duterte iti homecoming ket daytoy ti kaunaan a gundaway a panagsarungkarna iti City of Pines ken iti PMA kalpasan a nagtugaw kas dadaulo ti Pilipinas.
