BAGUIO CITY – Rinugianen ni PNP Chief General Oscar Albayalde ti panagrikosna iti nagduduma a rehiyon iti pagilian tapnu kitaen ti operational preparedness dagiti pulis iti masungad a Barangay ken Sangguniang Kabataan (SK) Elections inton May 14.
Sigun kenkuana, kitkitaenna ti kinasagana dagiti pulis iti pagilian gaputa mas personal ken mas intense ti barangay ken SK elections.
Kinunana a kasaritana dagiti ground commanders tapnu pagsaganaan dagitoy a naimbag ti nasao nga eleksion nangruna ti panang-assess dagitoy no kasapulan dagiti masakupanda ti kanayonan a pwersa ti pulisya.
Innayonna nga 80 percent iti pakabuklan a pwersa ti PNP ti maiwaras iti nagduduma a poling centers tapnu maipasigurado ti natalna ken naannayas a panagbobotos ken iti seguridad dagiti mannursuro nga agserbi kas board of election inspectors.
Maipalagip nga iti listaan ti COMELEC ket 5,744 dagiti election watch list of areas iti pagilian.
Idi kalman ti agsapa ket naangay ti commander’s time iti nagbaetan ni General Albayalde ken dagiti regional ground commanders dagiti pulis iti Cordillera, Region 1 ken Region 2 ken nagsaritaanda pay ti internal cleansing ti PNP.
Kalpasan daytoy ket nakipaset ti PNP Chief iti naangay a boodle fight sadiay Camp John Hay ditoy siudad ti Baguio.
