BAGUIO CITY – Agserbi ni Philippine National Police Chief Director General Ronald dela Rosa ken ti asawana kas kangrunaan a ninong ken ninang iti maangay a mass wedding iti Police Regional Office Cordillera (PROCOR) sadiay Camp Bado, Dangwa, La Trinidad, Benguet inton June 10.
Sigun kenni PCI Carol Lacuata, information officer ti PROCOR, napauluan ti nasao nga aktibidad a “Kasalan sa Kampo” 2017 a kaunaan a mass wedding ti pulisya.
Kinunana a paset daytoy ti internal cleansing ti PNP tapno maibilang a legally married dagiti pulis bayat a nasken a maipalagip kadagiti naasawaan a pulis dagiti insapata dagitoy kadagiti assawada.
Innayonna a malaksid iti mass wedding ket mangipatungpal met laeng dagitoy iti regional marriage enrichment seminar a pasetan dagiti pulis manipud iti nagduduma a probinsia iti rehion.
Dinakamat ni Lacuata a kalpasan ti mass wedding kadagiti pulis ket makisango dagitoy a mangan kada General Dela Rosa.
Maipaayan pay dagiti newly-weds a pulis iti libre a dua nga aldaw nga akomodasion iti maysa a hotel para iti honeymoon dagitoy.
