Impetteng ti Philippine National Police nga awan ti “sacred cows” iti imbestigasyon nga ipatpatungpalda seknan iti pannakapapatay daydi sigud a general ken Philippine Charity Sweepstakes board secretary Wesley Barayuga.
Sigun kenni Philippine National Police Spokesperson Police Brigadier General Jean Fajardo, awan ti ilaksidda a nangato a tao wenno opisyal bayat ti imbestigasyon dagitoy iti nasao a kaso.
Innayon ti nasao nga opisyal a ti pannakapapatay ni Barayuga ti maysa a kangrunaan a kaso nga im-imbestigaran ita dagiti panakabagi ti linteg.
Maipalagip a napalpaltugan ni Barayuga iti uneg ti lugan daytoy idi tawen 2020 ken idi laeng napalabas a bulan, impeksa ti maysa a pulis a dagiti mastermind iti pannakapapatay ni Barayuga ket da sigud a General Manager Royina Garma ken National Police Commission Commissioner Edilberto Leonardo.
Impeksa pay ni Fajardo a manarimaan nga agkolkolektarda iti ebidensya seknan iti nasao a kaso gapu ta kayatda a magun-od dagiti pamilya ni Barayuga ti hustisya.
