BAGUIO CITY – Impetteng ti Police Regional Office Cordillera (PROCOR) a propaganda laeng ti inaramid dagiti nagpabigbig a kameng ti Jennifer Cariño Command – NPA-Benguet a panang-hold up dagitoy iti maysa a pulis a kameng ti Buguias PNP.
Sigun kenni PCSupt. Elmo Francis Sarona, dadaulo ti PROCOR, idi paylaeng panawen ti Philippine Constabulary a naaddaan iti operasyon ti nasao a command.
Kinunana a nabayagen a narisut ti isyu a panagkikil dagiti pulis kadagiti vegetable dealers sadiay Buguias ken biniag laeng manen ti nasao a grupo tapno mariribuk ti panangipaay ti kapulisan iti serbisyo kadagiti umili.
Kabayatanna, panggep met ti PROCOR a mangipila iti kaso a robbery kontra iti grupo a nangala iti service firearm ti nasao a pulis ti Buguias PNP.
Ipilaanda met iti negligence ti nasao a pulis ken ti chief of police ti Buguias PNP bayat nga ad-adalen ti PROCOR no adda ti napasamak a ‘failure of intelligence’ sadiay.
Innayon pay ni Sarona a malaksid iti paltog ket inala dagiti suspek ti wallet ti nasao a pulis a naglon ti IDs ken P15,000 cash nga immunan a pinaglibakan dagiti rebelde.
Kabayatanna, agtultuloy ti panagala ti Philippine Army iti impormasyon mainaig iti kaadda wenno kinapudno ti Jennifer Cariño Command a grupo dagiti rebelde.
Iti panakipatang ti Bombo Radyo kenni Col. Leopoldo Imbang, commander ti 503rd Brigade ti 5th Infantry Division ti Philippine Army, kinunana nga awan iti listaanda ti nasao a grupo.
Mamati daytoy a posible nga ar-aramaten dagiti nangipatungpal iti panag-hold-up ti nabayag a nagan ti maysa a grupo dagiti rebelde tapnu isayangkatda dagiti propaganda dagitoy.
Kinunana nga awan ti namonitorda a presensia ti maysa nga NPA Command ditoy Cordillera ken impalawagna a ti maysa a command ket maysa nga armado a grupo a mangar-aramat kadagiti nabayag nga isyu.
Linawlawaganna met a saan a nagtaud iti probinsia ti Benguet dagiti mangbukbukel iti nasao a command.
Inyunay-unayna a saan pulos a kayat dagiti umili ti Benguet ti makikappeng iti aniaman a rebelde a grupo gaputa nakaipamaysa ti imatang dagitoy iti panagtrabaho para iti panagdur-as ti panagbiag dagitoy.
Impettengna pay a taktika laeng ti panangbiag manen iti maysa a grupo a nabayagen a naparmek ken saan nga agballigi gaputa saan metlaeng daytoy a kanunungan dagiti residente ti Benguet.
Innayonna nga agbinbinnadang ita ti militar ken pulisya tapnu maduktalan no asino dagiti manggangandat a mangbiag iti nasao a command ti rebelde a grupo.
