BAGUIO CITY – Pagan-annaden ti Philippine Overseas Employment Administration (POEA) dagiti Pilipino nga agbirbiruk ti panggedan kontra iti maiparparang nga employment opportunities wenno panggedan a maididiaya babaen iti social media nangruna kadagiti Facebook pages nga agpampammarang kas POEA-owned accounts.
Sigun kenni POEA Administrator Bernard Olalia, adda ti panagadu dagiti peke nga FB pages nga agar-aramat iti nagan ken logo ti POEA tapnu mangidiaya iti trabaho sadiay Australia, Canada, Germany, Japan, New Zealand ken iti United States.
Sigun kenkuana, dagitoy nga accounts wenno pages ket saan a naberipikar ken saan nga inaprobaran ti POEA.
Kinunana a dagitoy a peke a social media accounts nga agar-aramat iti nagan ken logo ti POEA ket pakairamanan ti sumaganad:
⦁ POEA Job Hirings in New Zealand
⦁ POEA Jobs Online
⦁ OFW POEA Jobs Abroad
⦁ POEA Jobs Abroad
⦁ POEA Job Hiring USA
⦁ POEA Job Hiring Australia
⦁ POEA Job Hiring UK
⦁ POEA Job Agency Hiring
⦁ POEA Trabaho Abroad Hiring
⦁ POEA Jobs in Dubai
⦁ Work Abroad-POEA Licensed Company
⦁ POEA Accredited Licensed Agency
Inyunay-unayna a ti facebook.com/poea.gov.ph ti official FB account ti POEA nga addaan ti blue checkmark a mangipakpakita a daytoy ti pudno nga account ti ahensia nga imberipikar ti mismo a Facebook.
