Inlawlawag ni Philippine Ambassador to the United States Jose Manuel “Babes” Romualdez a ti kooperasion ti Amerika seknan iti panangtaginayon iti kinatalged iti rehion ti Indo-Pacific iti sidong ti baro a termino ni President-elect Donald Trump ket saan nga agbaliw.
Daytoy ket kinuna ni Romualdez bayat ti “virtual forum” nga indauloan ti Foreign Correspondents Association of the Philippines (FOCAP), a nangdakamat a pagimbagan ti Estados Unidos a manglapped iti iseserrek dagiti barko ti China iti West Philippine Sea (WPS).
Para kenni Romualdez, napateg ti presensia ti Estados Unidos kas maysa nga kaalyado iti rehion kasta metten dagiti sumagmamano a miembro ti Association of Southeast Asian Nations (ASEAN) a nangpasangbay ti presensia ti Estados Unidos tapno mabalanse ti kababalin ken tignay ti China nangruna iti agdama a panawen.
Ti tension ket agtultuloy iti Beijing gaputa ikalkalinteganda a kukuada amin a paset ti South China Sea pakairamanan ti paset a kukua ti Vietnam, Indonesia, Malaysia, ken Brunei.
Nangabak ti Pilipinas iti international arbitration tribunal idiay The Hague idi 2016 gaputa awan ti ligal a pangibasaran ti China a kukuada amin a paset ti South China Sea, ngem inlaksid ti China ti desision.
Bayat ti administrasion ni United States President Joe Biden, impeksada a supsuportaranda ti Pilipinas iti pakasenan ti West Philippine Sea.
