Patien ni Caloocan Representative Edgar Erice a posible a marikna ti panagbalbaliw iti political alignment dagiti daduma a manmanday-linteg kasaruno ti panangiwaragawag ni Vice President Sara Duterte iti panggepna a panagtaray kas presidente iti 2028 elections.
Sigun kenni Erice, mabalin a mapasamak daytoy nangruna iti kanito a marugyanen ti panakatingiting dagiti naipila nga impeachment complaints kontra iti bise presidente.
Nupay kasta,impetteng ti nasao a manmanday-linteg a nakadepende latta ti desisyon ti Kamara iti agbalin a depensa ti kampo ni Vice President Duterte kadagiti naipila a reklamo kontra kenkuana.
Innayon ni Erice nga iti baet a nasapa ti panangideklara ni VP Sara a lumaban daytoy iti presidential race ken posible nga ibilbilang daytoy ti kampona kas istratehiya, patien ni Erice nga adu pay dagiti mabalin a pagbaliwan ti banbanag nangruna ket dua a tawen pay ti mapalabas sakbay ti 2028 elections.
Maipalagip nga idi laeng Mierkules, February 18 ket opisyal nga inwaragawag ni VP Sara ti panggepna a lumaban iti kinapresidente iti umay nga eleksyon.
Kasaruno dayta, adu dagiti rimwar a sayangguseng seknan kadagiti posible nga agbalin a running mate ni Duterte pakairamanan ni Senator Imee Marcos ken Senator Robin Padilla.
