Nangipila ti reklamo ti poll watchdog a Kontra Daya kontra iti maysa a partylist iti opisina ti Commission on Elections (Comelec) gaputa dagiti “nominees” ket mapapati a saanda nga ibagi ti marginalized sector.
Sigun kenni Kontra Daya Convenor Danilo Arao, naduktalan iti panagadalda a saan a pudno a “vendor” dagiti mangibagi iti partylist.
Para kenni Arao, dakkel a pananguyaw ti linteg nangruna ti Party-list System Act of 1995 ti kaadda dagiti kapada a partylist.
Nagtaud ti reklamo manipod iti panagadal ti Kontra Daya a 55.13% wenno 86 kadagiti 156 a party-list groups ti mangikagkagumaan a makagun-od ti puesto iti House of Representatives ti saan a mangibagi kadagiti nakurapay wenno dagiti “underrepresented.”
Immunan a kinuna ti Korte Suprema iti desisionna a dagiti nominess iti maysa a partylist ket mabalin a saan a kameng ti “marginalized sector” laketdi paneknekanda ti adbokasia dagitoy iti panangibagida iti maysa a sectoral group.
