Nasurok P17 billion ti posible a busbosen ti gobyerno para iti Barangay ken SK Elections inton umay a tawen.
Immunan a nailatang ti P8 billion a pondo para iti Barangay ken SK Elections inton Disyembre ngem nakanselar daytoy ken naiyakar inton October 30, 2023.
Sigun kenni Comelec Chairman George Garcia, P5.7 billion ti mabusbos iti honoraria dagiti mannursuro nga agserbi kas poll supervisors.
Dinakamatna a P900 million ti mabusbos iti panakaimprenta dagiti kanayonan a balota gapu iti manamnama a panagparehistro dagiti ad ado pay a botantes nu mailukat ti registration inton umay a bulan.
Sigun pay kenni Garcia, maaramat met ti P300 million iti training dagiti poll workers pakairamanan ti taraon, transportasyon, allowance, abang dagiti venues ken dagiti dadduma ket mabusbos iti operational cost ken suplay.
