BAGUIO CITY – Ur-urayen paylang ti National Irrigation Administration (NIA) – Cordillera ti panaka-aprobar ti 2019 national budget tapnu marugianen ti implementasyon dagiti nagduduma a programa ken proyekto dagitoy para iti irigasyon a nakalatang ita a tawen.
Sigun kenni Engr. Benito Espique, Regional Manager ti NIA-Cordillera, masapol a makagatangda kadagiti equipment ken materyales tapnu mapapartak ti panakaipatungpal dagiti proyekto partikular ti panakatarimaan dagiti irrigation systems iti nagduduma a paset ti rehiyon.
Dinakamatna a natarimaanen ti nasurok 200 nga irigasyon ditoy rehiyon partikular iti probinsia ti Ifugao, Apayao, Abra, Benguet ken Kalinga.
Puntirya ti ahensia a maipatungpal ti nabatbati a 61 a proyekto ti irigasyon iti rehiyon intun bulan ti Hunyo.
Inlawlawag pay ni Engr. Espique a naitantan ti implementasyon dagiti proyekto para iti irigasyon kalpasan ti panagdalapos dagiti nagsasaruno a kalamidad iti rehiyon.
