Impasigurado ni House Speaker Martin Romualdez a imbestigaran ti House of Repesentatives nu naaramat a nasayaat dagiti pondo a nairanta a mausar para kadagiti Pilipino.
Kagiddan daytoy, kinunana a masukatan ti chairman ti House Appropriation Committee a mangidadaulo iti panagtalantan ti tinawen a badyet ti gobierno.
Idi laeng kalman, kinuna ni Speaker Martin Romualdez a mangisayangkatda iti panagdinggeg kadagiti maseknan a komite iti House of Representatives tapno ammuen nu kasano a naaramat dagiti pondo a nakalatang para kadagiti tattao.
Naaramid ni Romualdez ti nasao a banag iti nabatbato a sangapulo ket dua nga aldaw a sesyon ti Kongreso sakbay dagitoy nga ag-adjourn tapno maipaayan ti dalan ti panagkampania dagiti mammanday-linteg para iti Eleksyon 2025.
Sigun kenni Romualdez, karamana kadagiti imbestigaranda ket ti smuggling ken hoarding kadagiti kangrunaan a produkto, ti P206 bilion a saan a napatgan nga aramaten ti National Grid Corporation of the Philippines; P11.18 bilion a gatad ti expired nga agas ken ti saan a naaramat a pondo ti Philippine Health Insurance Corp. ken ti mapapati a saan nga umno a panagaramat ti confidential funds.
Kinunana pay a saanda nga agpaapektar kadagiti kritiko iti maisayangkat a panagdinggeg.
Kabayatanna, inaprubaranen dagiti Congressman ti mosion ni Senior Deputy Majority Leader ken Ilocos Norte Rep. Sandro Marcos nga ideklara a bakante ti puesto ti Committee on Appropriations, a sigud nga idadauloan ni Ako Bicol party-list Rep. Zaldy Co.
Kalpasan ti maysa nga oras a panagaprubar ti mosion ni Marcos, kinuna ni Co iti maysa nga statement a naglusulos daytoy kas dadaulo iti nasao a komite gapu iti pakaseknan iti salun-at.
Impakaammona pay a kanayon nga agserbi daytoy iti pagragsakan ti kaaduan.
