Impakaamo ti International Federation of Red Cross and Red Crescent Societies a nakaawatda laeng iti bassit a paset ti emergency appeal para iti 100 milion a Swiss francs ($122.40 milion) a tumulong iti panagrekober iti napasamak a ginggined idiay Myanmar idi napalabas a bulan.
Ti 7.7 magnitude a ginggined idi Marso 28, a maysa kadagiti kapigsaan a nangdayyeg iti nasao a pagilian ket nakatayan ti nasurok a 3,600 nga indibidual, ken nangapektar kadagiti ginasgasut a tattao.
Sigun iti nasao nga ahensia, ti panagbaba dagiti internasional a donasion, a kimmaro gapu iti pannakakessay ti pondo ti U.S. babaen ti administrasion ni President Donald Trump, ti nakaigapuan ti kinakurang ti pondo.
Kinuna ni Alexander Matheou ti International Federation of Red Cross and Red Crescent Societies, adda ti 200,000 a tattao nga agnanaed kadagiti kalsada gapu ta saan a natalged nga agawid dagitoy.
Gapu iti daytoy, kasapulanda ti danum, taraon, pagturugan ken sanitation support, sigun kenni Matheou.
Maibasar iti datos, 3,645 ti napapatay iti ginggined, 5,017 ti nadangran, ken 148 ti mapukpukaw.
Dandani 49,000 a pagtaengan ken nasurok 2,100 a pasdek ti gobierno ti nakaro a nadadael.
