BAGUIO CITY – Imbinglay ti Department of Environment and Natural Resources (DENR)-Cordillera nga ad-adda a nanayonan ti pundo ti reforestation program kadagiti nagduduma a probinsiya iti rehiyon.
Kagiddan iti daytoy, kinuna ni DENR-CAR Regional Executive Director Engr. Ralph Pablo nga ad-adda a ngimmato iti 3,510 nga ektarya ti bantay ti puntiryada a maipasidong iti nasao a programa ita tawen.
Dinakamatna a nangatngato daytoy no idilig iti nasurok tallo gasut nga ektarya a naipasidong iti reforestation idi napan a tawen.
Inlawlawagna a maiwaras ti nasao a pundo kadagiti probinsiya nga addaan ti potential forest a mabalin a pagmulaan ti kayyo.
Impanamnama pay ni Pablo a papartakenda nga ipatungpal ti reforestation program nangruna ita a panawen ti panagtutudo ken planting season.
