BAGUIO CITY – Panggep ti City Health Services Office (CHSO) nga ammuen ti positivity rate ti Baguio seknan iti COVID-19 kasaruno ti maisaysayangkat a pooled testing kadagiti empleyado dagiti nagduduma nga establishimento ditoy siudad.
Sigun kenni Emilee Cuison, medical technologist ti Public Health Laboratory ti CHSO, maur-uray laengen ti resulta dagiti samples a nakolektarda iti uppat nga aldaw a pooled testing a nangrugi idi February 16 ken agleppas inton bigat.
Kinunana a dagiti samples a naalada kadagiti 58 nga indibidual iti napalabas a dua nga aldaw ket naipatulod iti Baguio General Hospital and Medical Center ken iti kanito nga agpositibo ti maysa iti tunggal lima nga indibidual a nakipaset iti pooled testing ket dagos a maipatungpal dagiti kaskenan nga addang kas iti contact tracing.
Dinakamatna nga awan ti nasken a pagdanagan dagiti agpositibo ti COVID-19 gaputa ibaklay ti gobyerno ti gastos iti panaka-agasda nupay kasapulan latta nga agbayadda ti sag-sangaribo a pisos sakbay a maipasidongda iti pooled testing.
Naituding met ti pooled testing inton bigat sadiay Kayang, Public Market, Naguilian Road, Bokawkawn Road, Ferguson Road, City Camp, Q.M ken sadiay Abanao Square.
Kiniddaw pay ni Cuison kadagiti amin nga empleyado ken dagiti agtagikua kadagiti establishimento ditoy siudad ti pannakitinnulongda tapno maamuan ti positivity rate ti COVID-19 ditoy siudad.
Immunan a kinuna ni Mayor Benjamin Magalong a ti pooled testing ket epektibo ken nalaka a wagas ti expanded testing kadagiti babassit a grupo babaen iti panagaramat ti maysa a COVID-19 test kit.
