BAGUIO CITY – Ad-adalen ti Regional Development Council ti posibilidad a mapagbalin kas housing wenno agri-tourism areas dagiti abandonado a pagminasan iti probinsia ti Benguet.
Iti kaudian a panagtataripnong ti Regional Land Use Commitee (RLUC), tinalatalantanda ti singasing ti mayor ti Itogon, Benguet a mapagbalin kas settlement wenno agri-tourism areas dagiti abandonado a pagminasan sadiay Itogon, Mankayan ken Tuba.
Naiyuman metten ti singasing ti nasao a komite iti technical working group para iti naan-anay a panagadal ken manamnama a maiparang iti Watershed Committee ken ti Committee on Indigenous Peoples’ Concerns.
Karaman metlaeng a tinalantan ti nasao nga komite ti maisaksakad a resolusyon para iti napartak a pannakaipasa ti National Land Use Act (Nalua) a pakairamanan ti pakaseknan ti rehiyon ken sumagmamano a paset ti Republic Act 11201 a mangpabileg iti Department of Human Settlements and Urban Development.
Immunan nga inyendorso ti RLUC ti Nalua Bill idi pay 2019 nu sadinno kangrunaan nga maiyunay-unay dagiti panakasustinir ken proteksion ken ti pannakabigbig iti pagrebbengan dagiti nainsigudan nga umili iti ancestral domains.
