BAGUIO CITY – Posible nga agbalin a bentahe iti Cordillera Region iti kanito a maamyendaran ti linteg ti Pilipinas tapnu maipalubos ti medikal a panaka-aramat ti marijuana.
Reaksion daytoy ni PDEA-Cordillera regional director Gil Castro iti desisyon ti United Nations a nangipababa iti klasipikasyon ti marijuana ken nangipalubos iti panaka-aramat daytoy iti medikal.
Iti interview ti Bombo Radyo Baguio, inlawlawagna a no agbalinen ti medikal a panagaramat ti marijuana ditoy pagilian ket dakkel ti posibilidad nga agbalin ti Cordillera a producer wenno pagtaudan ti marijuana gapu iti napintas a klima ken kangato ti lokasyon.
Innayonna a dakkel to daytoy a tulong iti ekonomiya ti rehion ken iti pagilian.
Nupay kasta, inyunay-unay ni Castro a tapnu matungpal daytoy ket nasken a mabaliwan ti linteg ti Pilipinas a mangipawpawil iti panagmula, panagilako ken panagaramat iti marijuana.
