BAGUIO CITY – Saan a kankanunungan ti maysa a Jeepney Association sadiay La trinidad ti posible a panakaipatungpal ti “no vaccination, no ride policy” ditoy lokalidad.
Sigun kenni Miguel Luma-ang, presidente ti Federation of Jeepney Association ti La Trinidad, agbalin daytoy a parigat kadagiti drivers gaputa saggaysan tu a sukimatenda ti vaccination card ti tunggal pasahero sakbayda a makalugan.
Kinunana a narigat ti agbalin a sitwasion dagiti driver gaputa saan nga amin ket agbibiahe iti point-to-point wenno saan a maymaysa a disso ti pagluganan ken bumabaan dagiti pasahero.
Impettengna a suportaranda ti nasao a polisiya iti kanito a maiwaras dagiti police personnel iti pagparadaan tapno dagitoy ti mangsukimat iti vaccination card dagiti pasahero.
Inlawlawagna nga adda dagiti driver a saan a nakaturpos iti panagadal isut gapuna a marigatanda a mangduktal no lehitimo wenno bogus ti iparparang dagiti pasahero a vaccination card.
