BENGUET – Posible a mabakantean ti posisyon ti kina-kongresista iti probinsya ti Benguet no saan a maiproklama ni Congressman-elect Eric Yap agingga Hunyo a trenta iti agdama a tawen, ti oathtaking dagiti nangabak nga opisyales.
Nupay kasta, impasigurado ni Atty. Julius Torres, Regional Director ti Commission on Elections Cordillera nga ar-aramidenda ti amin a kabaelanda tapno marisut dagiti amin a pakaseknan sakbay ti pormal a panagtugaw dagiti naiproklama nga opisyales.
Iti panakiuman ti Bombo Radyo kenni Atty. Torres, kinunana a maur-uray ti agbalin a desisyon ti poll body seknan iti panakaiproklama ni Congressman-elect Yap nangruna ket daytoy ti binutosan ti kaadoan iti napasamak nga election ngem saan laeng a nakumpleto ti proseso daytoy gapu iti panakaitantan ti proklamasyonna.
Iti kanito ng awan pay ti pangngedeng ti Commission on Elections, inlawlawag ni Atty. Torres a mabakantean ti posisyon agingga a rumuar ti desisyon.
Innayon ni Atty. Torres a kadagiti panakabakante ti posisyon iti kina-kongresista ti mabalin a mapasamak ket ti panakaadda iti caretaker wenno special elections.
Iti panakaiptungpal ti special elections, ti kongreso ti mangibaga no kasapulan ti nasao a banag nangruna ket agkasapulan daytoy iti budget ken daduma pay a preparasyon.
Kinuna ti Regional Director a ti kadawyan a mapaspasamak no bakante ti posisyon ti kina-kongresista ket ti panaka-adda iti caretaker no sadino iti rehiyon Cordillera ket dumanonen iti dua ti nagserbi kas caretaker a pakairamanan ni Congressman-elect Yap.
Kabayatanna, inlawlawag ni Atty. Torres a dagiti naabak nga opisyal ket saan a maiproklama kas iti second placer kadagiti gundaway a bakante ti posisyon ti kina-kongresista.
