Inwaragawag ti Philippine Postal Corporation (PHLPost) ti pannakaituloy ti aplikasion para iti postal IDs.
Maipalagip a sinuspinder ti Philippine Postal Corporation ti panagawat dagitoy iti rush ken regular ID application idi Marso a dies iti napalabas a tawen gapu iti technical issues.
Sigun iti nasao nga ahensia, kasapulan a personal nga agaplikar ti publiko kadagiti post offices branches iti pagilian.
Innayon pay ti nasao nga ahensia a masapul nga itugot dagiti First-time applicants ti maysa a kopya ti orihinal ken photocopy dagiti sumaganad a dokumento kas iti birth certificate manipud iti Philippine Statistics Authority wenno local civil registry, driver’s license, passporte ken dadduma pay para iti proof of identity.
Malaksid iti dayta, kasapulan metlaeng ti maysa a proof of address kas iti barangay clearance, certified true copy of lease, certified true copy of titles, certified true copy of real estate tax receipt, bank statement ken dadduma pay.
Kabayatanna, nasken a mangitugot dagiti aplikante iti orihinal ken photocopy ti expired postal ID dagitoy, anniaman a proof of identity ken address para iti renewal.
