BAGUIO CITY – Inalerto ita dagiti otoridad dagiti tallo a barangay iti munisipyo ti Tadian, Mt. Province seknan iti panaka-kontamina ti potable water system wenno pagtataudan ti mainom a danum dagitoy kasaruno ti panakadiskobre ti dua a kampo dagiti rebelde a New People’s Army sadiay.
Sigun kenni Police Major Carol Lacuata, panakangiwat ti Cordillera PNP, impasdek dagiti rebelde ti dua a kampo dagitoy iti masakupan ti pagtataudan ti danum dagiti barangays ti Duagan, Sumadel ken Nabitic.
Kinunana a nasarakan sadiay dagiti narurugit a benda wenno bedbed, medical wastes ken rugit wenno takki ti tao a naiwara iti asideg ti water reservoir ken intake tank ti water system.
Immunan a nadiskobre sadiay dagiti makasabidong a materyales iti panagaramid ti improvised explosive devices ken dagiti finished products kas iti granada ken claymore mines.
Nupay kasta, kinuna ni Lacuata a nasken pay nga urayen ti Tadian Municipal Health Office a malpas ti maisaysayangikat a clearing operations sakbay ti panagaramid dagitoy iti addang iti panakakontamina ti danum.
Naamuan nga impeksa metlaeng dagiti umili ti Bagnen, Bauko ti kapada a parikut kalpasan a nakontamina ti pagtataudan ti danumda sakbay pay ti rinnupak iti nagbaetan ti tropa ti gobyerno ken dagiti rebelde.
Kinuna dagiti residente a narugit ti danumda gapu kadagiti kampo dagiti rebelde iti asideg ti pagtataudan ti danum dagitoy.
Gapu iti nasao a banag, iyap-apela ita ti Cordillera PNP ti regular a panangsukimat dagiti umili kadagiti nasusulinek a babbarangay iti rehiyon iti water sources dagitoy manipud iti aniaman a presensia dagiti kampo dagiti rebelde a grupo.
