BAGUIO CITY – Naituding nga adalen ti Department of Energy (DOE) ti posibilidad ti geothermal energy iti tallo nga ili iti rehion Cordillera.
Sakupen ti panagadal ti geothermal fields ti Buguias – Tinoc ken Tuba-Pugo malaksid pay iti Mt. Malindang sadiay Misamis Occidental, Mt. Sembrano sadiay Rizal, Mati – Lupon Tarragona ken Coron sadiay Palawan.
Gapu iti daytoy, nangipatungpal ti ahensia iti information, education and communication campaign kadagiti maseknan nga stakeholders ti Cordillera a dinar-ayan dagiti panakabagi ti Pugo, La Union.
Impalawag ni DOE-Renewable Energy Management Bureau Assistant Director Marissa Cerezo a ti renewable energy development project ti gobyerno ket paset ti addang ti ahensia tapnu maipasigurado ti umdas a suplay ti energy wenno kuryente iti pagilian, saan laeng a para iti agdama a pagkasapulan ngem uray pay kadagiti sumarsaruno a henerasyon.
Impasiguradona pay a saan a madadael ti aglawlaw ken dagiti kultura dagiti nainsigudan nga umili kabayatan ti panakaipatungpal ti panagadal.
Sakupen ti panagadal ti panakaipatungpal laeng ti geological survey ken geochemical survey wenno agkolektarda laeng iti bato, daga ken danum para iti laboratory test ken iti kanito a kasapulan a maipatungpal ti geophysical testing ket sadiay a makisaritada manen kadagiti maseknan nga umili.
