BAGUIO CITY–Posible a masuspindir ken makanselar ti prangkisa ti dua a kompanya dagiti bus a nairaman iti aksidente iti national road sadiay Bisibisan, Barangay Supang, Sabangan, Mountain Province idi laeng nabiit.
Sigun kenni Engr. Robert Allan Santiago, regional director ti Department of Transportation (DOTr) – Cordillera, ti suspension ket agdepende iti resulta ti imbestigasyon ti ahensiada.
Kinunana nga imbilinnan ti panangimbestigar met ni Atty. Jessie Balagot manipud iti Land Transportation Franchising and Regulatory Board (LTFRB) – Cordillera iti kaso ken iti panangiruar daytoy iti ‘show cause order’ iti dua a kompanya ti bus.
Maipalagip nga agarup 27 nga indibidual ti nadangran kalpasan a nagdinnungpar ti parapasahero a bus ti Rising Sun nga inmaneho ni Dave Bangcado ken ti parapasahero a bus ti GL Trans nga inmaneho ni Blester Bing-il idi May 24.
Naduktalan iti imbestigasyon ti pulisya a paturong ti bus ti GL Trans sadiay Besao idi killaat a naikadlis ti pilid daytoy ken inokuparna ti bangir a linya iti kalsada ken sadiay a nadungparna ti bus ti Rising Sun a paturong met iti Sabangan.
Innayon ni Santiago a no maduktalan nga adda ti parikut iti maysa kadagiti kompanya wenno iti mismo dua a kompanya ket posible a masuspindir ti prangkisa dagitoy.
Dinakamatna pay a ti kakaruan ket ti panakakanselar ti prangkisa dagiti maduktalan nga addaan iti parikut.
