BAGUIO CITY – Naipangato ti premyo dagiti mangabak iti nagduduma a kompetisyon iti 23rd Baguio Flower Festival wenno Panagbenga 2018.
Sigun kenni Freddie Alquiroz, co-chairman ti Panagbenga Festival Executive Committee, nagbalin a P500,000 ti premyo ti mangabak iti Grand Float Parade competition manipud iti sigud a P350,000.
Kinunana a makaiyawid met iti P300,000 ti mangabak iti Grand Street Dance Parade competition manipud iti sigud a P150,000.
Inlawlawag ni Alquiroz a babaen iti pannakaipangato ti premyo ket ad-adda a maallukoy dagiti makipaset a mangpapintas pay iti performance dagitoy.
Kinunana a manamnama met laeng a mapapintas dagiti maiparang a floats gapu iti nangatngato a premyo ti mangabak.
Dinakamatna pay nga ita a tawen ket dumanon iti P6.5 million ti pondo ti Panagbenga Festival ken manipud iti daytoy ket P4 million ti impaay ti lokal a gobyerno bayat a P2.5 million ti nagtaud iti Baguio Flower Festival Foundation Inc.
