BAGUIO CITY – Naipaayen ti cash prize dagiti sections iti Baguio City Public Market a nangabak iti naisayangkat a Rat Catching Challenge sadiay.
Naawat ti lechon section ti P20,000 kas first placer iti pasalip kalpasan a nailistada ti catching rate ratio a 7.9 bayat a naawat ti Pines Meat Mart ti P10,000 kas second placer kalpasan a nailistada ti catching rate ratio a 7.4 ken naawat met ti entrails section ti P5,000 kas third placer iti nailistada a catching rate ratio a 7.29.
Naipaayan met iti P2,000 ken certificate of recognition ti fish extension section nga addaan ti 84 nga stalls kalpasan a dagitoy iti nakatiliw iti kaaduan nga utot a dumanon iti 536.
Naipaayan metlang iti kapada a gatad ken sertipikasyon ti vendor a ni Merlinita Dacalano kalpasan a nabigbig ti pwestona a nakatiliw iti kaaduan nga utot a dumanon iti 45.
Nakaawat met iti certificate of recognition dagiti top 10 sections iti nasao a pasalip a pakairamanan ti Block 4 relocation section, meat section, fish proper section, fish extention section, 2nd Kayang Area, Block 3 section ken ti vegetable beside chicken section.
Maipalagip nga iti makabulan a Rat Catching Challenge iti merkado ti siudad idi Abril ket agarup 1,800 nga utot ti natiliw.
Impeksa met ni Baguio Mayor Benjamin Magalong ti panagyamanna kadagiti nakipaset a vendors ken inyapelana ti panakaituloy ti aktibidad tapnu naan-anay a madalusan ti public market manipud kadagiti utot, saan laeng ita nga adda ti COVID-19 pandemic.
Innayonna a gapu iti panagballigi ti aktibidad met maaddaan iti maikadua a rikos ti Rat Catching Challenge ken dagiti maipaayan iti premyo ket ti Top 5.
Naamuan met iti Baguio City Public Market Authority a dumanonen iti 2,400 nga utot ti naisumitir iti opisinada manipud nangrugi ti pasalip agingga ita manipud iti nagduduma a section ti merkado publiko.
Maipalagip a maimanmandato ita ti panakaimuntar ti rat trap kadagiti amin nga stalls iti merkado publiko ti siudad para iti agtultuloy a panakatiliw dagiti utot sadiay.
