Impablaak ni President Ferdinand “Bongbong” Marcos Jr. idi laeng kalman ti rabii a maiturong ni sigud a President Rodrigo Duterte idiay The Hague, Netherlands tapno sanguen dagiti kasona seknan iti pammapatay a naaramidna idi naiyuswat ti “war on drugs” ti administrasionna.
Sinango ni President Marcos ti media kalpasan a nakatayaben ti eroplano a nagluganan ni sigud a President Duterte idiay Villamor Airbase iti oras ti 11:03 ti rabii.
Inlawlawag ni Marcos a ti pannakakemmeg ni sigud a President Duterte manipod iti International Criminal Court ket umno ken umisio.
Inkalinteganna a naaramid ti pannakakemmeg gaputa kiniddaw ti International Police wenno Interpol nga aramidenda ti addang ken adda ti “commitment” daytoy.
Adda ni Duterte iti sidong dagiti otoridad kalpasan a nakemmeg gapu iti kasona a “crimes against humanity.”
Idi laeng kalman, kinumpirmar ti Presidential Communications Office nga idi nakasangpet ti sigud a presidente idiay Manila, dagos nga inserbi dagiti otoridad ti warrant of arrest manipod iti International Criminal Court (ICC) kontra kenkuana.
Immunan a kinuna ni sigud a President Duterte a nakasagana a sanguenna ti warrant of arrest nga impaulog ti International Criminal Court para iti kontrobersial a war on illegal drugs, ken kinunana a sanguenna a direkta kas maysa nga abogado ken saan nga aglibas iti dadduma a pagilian.
Maysa kadagiti legal counsel daytoy a ni sigud a Labor Secretary Silvestre Bello, kinunanana a nakasagana ti kampo ni Duterte iti sumaruno a ligal nga addang kasaruno ti pannakakemmegna.
