Ginuyugoy ni President Ferdinand “Bongbong” Marcos Jr. dagiti Pilipino a gundawayanda dagiti job fairs nga inyuswat ti gobierno babaen ti “Trabaho sa Bagong Pilipinas” nga inisiatibo ti administrasionna.
Daytoy ket bayat ti job fair para kadagiti benepisiario ti Pantawid Pamilyang Pilipino Program (4Ps) idiay Tagum City, Davao del Norte.
Sigun kenni President Marcos, bayat ti job fair nga indauluan ti gobierno idi Enero ita a tawen, nasurok 9,068 nga indibidual ti nag-apply para iti job offerings, a nasurok a 1,028 ti “hired on the spot.”
Dumanon met iti siam a pulo ket lima a benepisiario ti Pantawid Pamilyang Pilipino Program (4Ps) ti na-hire.
Impaganetget ni President Marcos ti balligi ti 1,908 job fairs idi napalabas a tawen, nu sadinno 66,667 nga indibidual ti natangdanan iti nasao a lugar.
Kabayatanna, ti programa a “Trabaho sa Bagong Pilipinas” ket addaan panggep a pabilgen dagiti benepisiario ti 4Ps iti oportunidad a makapagtigged, “livelihood assistance,” ken pananggun-od kadagiti kasapulan a serbisio a suporta.
